Reviews

ಹುಬ್ಬಳ್ಳಿಯ ಸಾಹಿತ್ಯ ಪ್ರಕಾಶನ ಮತ್ತು ಅದರ ಮಾಲೀಕರಾದ ಶ್ರೀ ಎಂ. ಎ. ಸುಬ್ರಹ್ಮಣ್ಯ ಅವರೂ ನಾವೂ ಸಾಹಿತ್ಯ ಕುಟುಂಬದ ಸಮಾನ ಬಂಧುಗಳಾಗಿದ್ದೇವೆ. ರಕ್ತ, ದಾಯಾದರ ಬಾಂಧವ್ಯಕ್ಕಿಂತ, ಮೌಲ್ಯಾತ್ಮಕ, ಸಾಹಿತ್ಯಸುಧೆಯ ಹಂಚಿಕೆಯ, ಆತ್ಮೀಯ ಬಾಂಧವ್ಯ ಹೆಚ್ಚು ದೃಢ, ವಿಶ್ವಾಸಾರ್ಹ ಮತ್ತು ಲೋಕೋಪಕಾರಕ ಎಂದು ನಾನು, ಈ ಸಂಬಂಧ ಬೆಳೆದ ಸುಮಾರು ಇಪ್ಪತ್ತು ವರ್ಷಗಳಿಂದಲೂ ನಂಬಿದ್ದೇನೆ. ಎಲ್ಲ ಪ್ರಕಾಶಕರೂ ತಮ್ಮ ಬಳಿ ಬಂದ ಎಲ್ಲಾ ಪುಸ್ತಕಗಳನ್ನೂ ಓದುವುದಿಲ್ಲ, ಬರೆದವರನ್ನು ಹಚ್ಚಿಕೊಳ್ಳುವುದೂ ಇಲ್ಲ! ಅದು ವ್ಯಾಪಾರೀ ಮನೋಭಾವದಲ್ಲಿ ನೆಲೆನಿಂತ ಸಾಮಾನ್ಯ ತಾತ್ಕಾಲಿಕ ಸಂಬಂಧ. ನನ್ನದು ಸುಬ್ರಹ್ಮಣ್ಯ ಅವರದೂ ಹಾಗಲ್ಲ. Unique ಎಂಬುದನ್ನು ಇಬ್ಬರ ನಡುವಿನ ಅನೇಕಾನೇಕ ಸ್ನೇಹಿತರೂ, ಓದುಗರೂ, ಸಾಹಿತ್ಯ ಬಾಂಧವರೂ ಬಲ್ಲರು. ಅವರ ಸುಪುತ್ರ ಶ್ರೀ ಋತ್ವಿಕ ಈಗ ಇದೇ ನೆರಳಲ್ಲಿ ‘‘ಸುಬ್ಬು’’ ಎಂಬ ಒಂದು ಆಂಗ್ಲ ಪ್ರಕಾಶನ ಸ್ಥಾಪಿಸಿ, ಹತ್ತಾರು ಮೌಲ್ಯಾತ್ಮಕ, ವಿಶ್ವವ್ಯಾಪಿ ಗ್ರಂಥಗಳನ್ನು ಹೊರತಂದಿದ್ದು, ನನ್ನ ಆಶೀರ್ವಾದವಿದೆ. ಇಂಗ್ಲೆಂಡಿನ Macmillan ಅಥವಾ ಇತರ ಶತಮಾನಗಳ ಹಳೆಯ ಪ್ರಸಿದ್ಧ ಪುಸ್ತಕಪ್ರಿಯರ ಆದರಣೀಯ ಸಂಸ್ಥೆಗಳಂತೆ ಇವರ ಪ್ರಕಾಶನವೂ Premier ಎಂಬ ಮಟ್ಟಕ್ಕೆ ಬೆಳೆಯಬೇಕೆಂದು ನನ್ನ ಆಸೆ. ಅದು ನೆರವೇರುತ್ತಲೂ ಬರುತ್ತಿದೆ ಎಂಬುದು ಸಂತೋಷ. ಸುಬ್ರಹ್ಮಣ್ಯ ಅವರಿಗೆ ಓದು ಇದೆ, ಧೈರ‌್ಯ ಇದೆ, ಬರೆಹಗಾರರ ಪ್ರತಿಭೆ ಗುರುತಿಸುವ ಚುರುಕುತನ, ಓದುಗರ ನಾಡಿ ಪರೀಕ್ಷೆ, ಮನೆಮನೆಗೆ ಪುಸ್ತಕ ಮುಟ್ಟಿಸುವ ಯೋಜನೆಗಳು, ಛಲ, ಸಾಂಸ್ಕೃತಿಕ ಬೇರು ಭದ್ರತೆ, ಜನಾದರಣೆ, ನವನವ ಬರೆಹಗಾರರನ್ನು ಪ್ರೋತ್ಸಾಹಿಸುವ ಗುಣ, ಸಹನೆ, ಏನೆಲ್ಲ ಮೌಲ್ಯಗಳ ಗಣನೆಯಲ್ಲಿ ಬರುತ್ತದೋ, ಅದೆಲ್ಲ ಇದೆ. ಅವರದು ಅಕ್ಷಯ Resourcefulness.. ಇಂಥ ಮಹನೀಯರ ಸಂಸ್ಥೆ ಈಗ ತನ್ನದೇ Website ಸ್ಥಾಪಿಸುತ್ತಿರುವುದು ತೃಪ್ತಿ.